أضف سؤال أو موضوع جديد          

قصتي المليئه بالاكشن _ ملاحظه القصه طويله يعني اذا فاضي حياك

up 82 down 23
ابو يزيد 000 8711
قبل 7 سنه و شهر



السلام عليكم ورحمة الله وبركاته

طبعا السالفه جتني قبل اسبوع بالتفصيل ولا السالفه من زمان اعرفها لكن جتني الان بالتفصيل وقلت اطرحها لكم

القصه صحيح طويله , لكن اللي فاضي ولا عنده شيء يقراه , اقرأ وضيع شوي من وقتك , ومنها تستفيد وتتعض وتبتسم وتعطينا رأيك وتقدر تعبنا هههه

اغلبكم الان طفشان ويحدث الصفحه , انا اقولكم اقرا القصه صح انها طويله لكن مافيه مشكله

بسم الله , ملاحظه القصه اخذتها بالتفصيل من ولد عمتي ( فلان ) , واعتبروني الان انا ( فلان )

عمي طلع جيب 2013 وكاله وكان ماشي وقتها 10 الاف كيلو وباقي بقراطيسه

ندخل بالسالفه على طول

عمي نزل من البيت وشغل سيارته وبيروح يجيب زوجته وبناته وعياله من عند جدتهم

وطلب عشا من التلفون قبل لا يطلع من البيت وخلص العشاء فراح عند المطعم ووقف السياره عند المطعم وطبعا المطعم قريب من البيت

وكان بالسياره ايباد جديده و جالكسي تاب جديد حاطها عند الرجول جهه الراكب عشان بيعطها عياله هديه

والسياره مضلله كامل زيرو 2

المهم نزل من سيارته وهي شغاله طبعا , وقفلها بالبصمه من باب السائق وقال ان شاء الله محد يشوف الجوالات

دخل المطعم واخذ الفاتوره وجاء يطلع المحفظه من جيبه و ما لقى المفتاح حق السياره في جيبه !!!

المهم طلع الفلوس بسرعه و عطاه فلوسه وراح يستلم العشاء ويوم اخذ العشاء

طلع بسرعه عند السياره الا والجيب داق الرويس وكفراته تفر

رما العشاء و كان بينط على الكبوت

لكن خلاص طاح الفاس بالراس

ويقول قسم بالله ماعادت رجولي تشيلني من الموقف

ويقول شفتهم الكلاب ( واحد ابيض + واحد اسمر )

ودق علي على طول

وانا وقتها كنت على طريق المطار ومعي خويي وخويي مسافر لـ كندا ( رحله دوليه ) ولا راحت الرحله راح مستقبل الولد لانه مبتعث

المهم ما ادري الا ويدق جوالي

واطلع الجوال والقاه عمي وارد

الا وعمي فقع اذني , الحقني ياولد بسرعه , بسرعه تعالي , تسمع ولا لا بسرعه تعال الحقني الحقني

وانا اقول بسم الله عليك , واللهم اجعله خير , وش فيك , اذكر الله قل لا اله الا الله ويقول لا اله الا الله

اقوله فهمني السالفه الله يهديك

قال سيارتي انسرقت , قلت يالليل الحين وقت استهبال انت وراسك هههه قسم بالله اخذت قلبي

قال يا كلب انت من عمري عشان استهبل معك هاه , شف لا تخليني احلف بالله اني امسح فيك الارض يا خسيس , بسرعه امش

وانا ماني مصدق , فقلت من وين انسرقت قال من الــ ( خصوصيه ) , فقلت يارجال مدامها انسرقت من نفس الحي اللي انت ساكن فيه

ارجع للبيت وبتلقاها عند البيت , تلقاه علي _ ( ولد اخوه ) _ يمزح معك هو واخوياه , ( لانهم ساكنين بالفله اللي جنب عمي )

ويقعد يسب في التلفووون ههههههه وانا اضحك واقول يالله ماني فاضي وراي مشوار طويل وقعد يلعني ويسبني

واقوله معي زميلي عنده رحله دوليه تعرف وشي دوليه يعني مستقبل الولد بين يديني واقفل الجوال

وزميلي يقولي وش السالفه , فقلت له ان عمي يقول انسرقت سيارته واعرف انه يستهبل علي , قال لا يارجال خلاص نزلني وبروح تكسي , قلت قسم بالله لو ايش ماتنزل اصه عني بس

وشوي الا والجوال يدق مره ثانيه , الا وانا انخرشت قلت ذا من جده !!

وارد عليه ويقول لعنك الله ليه تقفل في وجهي ياقليل الحياء ومدري ويش .....

وقلت بالله من جدك صادق انت ؟؟ قال وانا من عمرك عشان امزح معك يا خـــ!!!! كلام مشفر

و اقوله قسم بالله حسبتك تمزح , دقايق وانا جايك بس بأنزل خويي واجيك , قال اقول تعال ذلحين ما تفهم انت , نزل خويك بالشارع وتعال انا فـ البيت الان باخذ غرض

واقوله طيب جايك جايك الحين

ويقول خويي وش صار واقوله من جد انسرق الجيب , وقال نزلني هنا ما عليك فيني بدبر نفسي

وقلت افا عليك بس , انا خويك بالليالي المعاسير ،،، ولا وقت الرخا كل (ن) يسد مكاني ,,, ما قلت ذا البيت صراحه هههه بس هياط وكذا

المهم

ودزها يالذيب بالجمس والطبلون على الفصله وأنزل خويي المطار وقلت بيننا تواصل بإذن الله

وقال اوكك والله يستر عليكم

وارجع لعمي وانا على الفصله واوصل البيت وما حصلته ودقيت عليه وقال طلعت مع اخوك بالفورد واحنا بالعليا لان السياره وقفت بالعليا وقلت لهم كيف عرفتوا موقعها وقال لي لا جيت تعرف

واقولهم طيب شوي وانا جايكم ووصلت عندهم بالعليا ووصفولي المكان ورحت لهم وكان هو واخوي و اثنين من اخوياه قابلناهم هناك , وطبعا تقابلنا في كافي شوب واقولكم ليه

طلع عمي حاط بالسياره جهاز تتبع بالسياره و الشركه معطينه اسم مستخدم ورقم سري على موقعهم بالنت

ولازم يكون في نت عشان يتتبع السياره , فهو يقول رحت للبيت واخذت الابتوب ودخلت على موقعهم و لقيت السياره تدور بالعليا وشوي وقفت السياره فمشينا ورحنا للموقع وما حصلنا السياره فقلت خلنا نروح عند الكافي شوب الفلاني ونتقابل كلنا فيه وعشان يكون فيه نت ونشوف السياره وين طست

وصلنا كلنا عند الكافي

اللي هو انا بسيارتي تاهو , واخوي وعمي بالفورد , واثنين من اخويا عمي بسياره اخرى

وتدرون وين لقينا السياره !! , لقيناها على خط الخرج مقلعه !! , توها قبل شوي كانت بالعليا

المهم وكل واحد يركب سيارته ويالله على الخرج , وانا دقيت على اخوياي واثنين اعتذروا واثنين وافقوا يجو معي , وكل واحد جاء بسيارته واحد معه عفريته ومفك عجل والثاني معه عجره وابو جلمبو هههه مجهزين نفوسهم

المهم ومسكت خط الخرج طاير وكلمتهم وقالوا احنا الحين نتبع السياره عن طريق الكونكت لكن الكوكنت ضعيف ويقطع

والسياره تدور عيت توقف وبنوقف عند أقرب شقق بالخرج لان ارسال الكونكت ضعيف ونبغا ارسال اقوى


طبعا السياره انسرقت من المغرب الساعه 6 وعيت توقف وقفت بس لحظه في العليا وبعدها عيت توقف , مافيه الا دوران

وجهاز التتبع اذا طلع لون السياره اخظر يعني السياره تتحرك , اذا سار لون السياره احمر يعني وقفت ويطلع صوت ( طيط ) اذا وقفت

واحنا وصلنا الخرج الساعه 11 ونص وعلى طول دخلنا شقق ايجار و شغلنا الابتوب ولقينا السياره عند مستودعاات الخرج تدور وطولت وهي تدور هناك فعرفنا ان فيه شيء هناك لانه طول وهو يدور واحنا بس نبغاها توقف عشان نروح لها

المهم شوي والا اللي بالاستقبال على الكونتر بالشقق يجيه اتصال !!

جاء عندنا وقال والله ما ادري وش اسوي وانا مو من السعوديه وخايف , قلنا وش السالفه , قال خويي في شقق قريبه من هنا يقول قبل نص ساعه جاله ولد بسيارته وهدده بــالــســلاح وسرق كل اللي بالخزنه !!


يا ساتر

و قلنا اتصل على هذا وقوله وش السياره , اتصل وقال جيب صغير لونه ابيض وفيه ولد عمره حدث عمره 17 18 سنه بشرته بيضا !!

ويقول ان العامل لحقه وضرب القزازه الخلفيه بعصا حديد وكسر القزازه الخلفيه لكن شرد الولد ,, وعمي قال كسرووو لحيه ههههه

وانا نطيت وقلت الله يعينهم ووالله ما ندري وش نسوي >> ما وضحت لهم انها سيارتنا ونغزت عمي يسكت عشان لا تجي مطاره من الدوريات وتروح السياره تشليح

المهم وصلوا اخوياي وكانوا معي , وواحد من اخوياي قال ياولد شكلكم مطولين وانا بكره عندي مقابله عشان بتوضف , وقلنا له والله شكلنا مطولين , قال خلاص بروح انا واذا احتجتوني اتصلوا علي وما عليكم بجيكم وبخلي جوالي شغال وقلنا ماتقصر



وما بقي الا واحد من اخوياي وقلت له ترا عايدي اذا تبغا تروح وماعليك بندبر نفوسنا

وقال لي افا عليك بس , انا خويك لعنبو من تحداك ** خذني على يمناك عسكر كتبيه ** ضباط هتلر والزعامه بيمناك ** تمشي على رأيك معزه وهيبه ** وإن ما نفعتك يا رفيقي بدنياك ** لا تعتبرني واحد(ن) من قبيله

لا تسيروا مخاف عاد هههه ما قال لي كذا , قال كل تبن بس , تعرفون مشاعر شعبنا معوقه , وكل تبن تعني استح عن وجهك انا خويك وعيب الكلام هذا ههههه

المهم هذا الخوي شغال في حرس الحدود وقد مر عليه مثل هذي الامور يعني عنده خلفيه عن هذي الامور

المهم الساعه 1 الليل الا والابتوب يقول طيط طيط طيط طيط

وكلنا ننط عنده الا والجيب وقف عند مصانع ومستودعات في الخرج

وعلى طول كلنا بدون اي ترتيب نطلع طايرين على السيارات ( انا وعمي وخويي واخوي و الاثنين اللي يعرفون عمي )

وفي الاخير وقف خويي وقال لازم يكون فيه واحد عند الابتوب عشان يعلمنا اذا السياره تحركت او لا , ويعلمنا الوصف , ولازم يكون فيه واحد احتياط ينتضرنا هنا

وقالوا اخويا عمي الاثنين خلاص ازهلوها احنا بنقعد , واحد بيراقب الابتوب والثاني مستعد بس عطوه اتصال أو رساله في وقت الحاجه وبيجكم طاير بإذن الله

قلنا تمام عليكم , وركبت انا وعمي وخويي في سيارتي وقلت لخويي يسوق لانه ما شاء الله حريف سواقه وعنده خبره في هذي الامور وبيني وبينكم لو سقت انا كان وديت السيارتين بتشليح الحاير هههه نعم هنا التهور والله لـ احش ( ادخل ) صدام الجمس في حلقه ههههه

واخوي ركب الفورد حقه ويمشي ورانا

المهم وصلنا للموقع وكلمنا الشباب ووصفوا لنا موقع السياره ويقولون ما تحركت للان فأسرعوا

المهم واحنا رايحين لها قعدت اقول لعمي

الحين بنلقى ابواب السياره مفكفكه والمراتب مفكفكه وبتلقاهم الحين بدو في فك القير والمكينه


ويفصل علي عمي وقتها ههههههه وهاتك هواش كان بيحشني تحت المرتبه من الغبنه

وأقوله و انا ما اقول الا الصدق لان ذيك المواقع مستودعات فيكونوا مجهزين الوضع هناك , قال والله لو ما تسكت لا احذفك من السياره

المهم شوي واحنا ماشين الا ونشوف السياره واقفه بين جدار مستودع وردميه على يمينه وهو واقف على الرصيف اللي بالنص

يعني السياره واقفه بين الردميه ( على يمينه ) و الجدار ( على يساره ) ومقدم السياره 10 متر وجدار المستودع يمكن 40 متر

المهم , نزلنا وانا اخذت العفريته وعمي اخذ حصا كبيره و خويي معه مفك عجل وعفريته

وقلنا اطلع يا ابن ... ولا فيه استجابه و السياره شغاله والمشكله مضلله وفي عتمه الليل ما يبان اللي فيها

خويي رجع للجمس وقدمه وركب الرصيف وشغل النور على العالي على السياره وما شفنا احد بالسياره

نزل وقال السياره فاضيه , وفتحنا الباب واحنا مستعدين على اكمل وجهه لاي ردة فعل

والحمد لله ما طلع احد فيها واحنا نتنافض من الخرعه لان ما معنا سلاح ناري وهو معه واحد

ولقينا السياره مكبوب على طبلونها ببسي و مكبوب على قزازها بالكامل ببسي >> وقال خويي ان الببسي يزيل البصمات !!

ولقيته حاط المكيف على الحار على درجه 5 ( اقوى درجه ) >> وقال المكيف الحار شغله عشان يمحي البصمات !!

والحمد لله درنا على السياره وما لقينا فيه حوادث ما غير القزاز الخلفي مكسور

وقلنا عوافي اذا هي على القزاز انا الدفع قيمة القزازه و خويي يدفع قيمة التضليل هههه , والله كنت بأتمردغ لكن ربك ستر

المهم قلت لعمي خذ المفتاح وطف السياره لا يرجع ويسرقها

قال عمي لا لا , لا تسوي شيء , انا ما بلغت عنها نهائيا , قلت له صحبتك ليه ما بلغت , قال خل عنك الكلام الفاضي اقولك مدري وش اسوي اول مره انخرش مثل كذا

المهم وقال خويي خلاص اجل لازم واحد منا يروح يجيب دوريه من على البوابه عشان تجي تشوف وتاخذ البصمات وتعمم على السياره خلال الفتره اللي انسرقت فيها لا يكون سوا فيها جريمه قتل ولا اختطاف

قال اخوي راعي الفورد انا بروح

وقلنا اوك , وراح يجيب دوريه , واحنا واقفين على الشارع ونزلت السياره من على الرصيف على الشارع وشغلت الانوار عشان يشوفنا اخوي والدوريه اذا جو لان الشارع فيه ظلام عاتم كلنا مشغلين كشافات الجوال ما نشوف شيء

وطبعا سياره عمي على يمين الجمس واقفه فوق الرصيف بين الجدار و الردميه ووراها الجمس

المهم واحنا نستناهم خويي نط يقول والله اني ماني مطمئن احس انه بيرجع يسرقها مدام انه خلاها شغاله

وقلت له يارجال نحا سيارتي قريبه منه وما بيقدر يرجع لان سيارتي منعرضه وراه ويمينه رديمه و يساره جدار وقدامه ب 30 متر شارع بس المسافه بين الشارع و الرصيف كبيره و ما اتوقع يمشي قدام لانه بيحك ببطن السياره

قال يقدر يمشي على الرصيف لين نهايته ينزل على الشارع بدون ما يدق اي فرمله ويكسر بطن الموتر ماعنده مشكله واصلا السياره ماهي له لو تقوله يركب بها الرديمه ركبها ولا يهمه , انا انخرشت وقلت لعمي خذ المفتاح احسن لك , قال ولا تلمسها

ورجعت قلت ياولد لا تتشائهم ونحانا نشوفها ما بيننا وبين السياره الا 10 متر

الساعه حاليا 2 وربع تقريبا بالليل والدنيا ظلام ما فيه غير انوار سيارتنا شغاله

واحنا نتكلم الا ونسمع صوت فتحت باب و تفحيط كفرات وعمي يقول الجيب انسرق الجيب انسرق

ونركب الجمس مثل المجانين ونركب الرصيف ونلحق وراه وينزل بسرعه من على الرصيف ويطيح على الشارع واشوف شرر يطلع من بطن جيب عمي

واحنا وراه بالجمس واقوله لخويي فدا يارجال فدا وننزل بسرعه وما حسيت بـحك في بطن السياره

لكن الجيب شفت الشرر يطلع من بطنه

على العموم قلت لخويي الموتر موترك , يفداك من الصدام للصدام , اصدم الحرامي

وعمي قاعد ورا طبعا , ما ادري كيف اصلا كيف ركبنا السياره , على طول ركبنا السياره مثل المجانين

وقلت لعمي في اثناء المطارده تعال قدام وانا بأقعد بالنص بأرفع التكايه وقال لا خلني ورا وقلت ليه قال ما ادري بس انت كل تبن وخلنا نشوف ( الخرشه سوت فيه كذا ) فما عاد يدري وش يسوي

المهم انه ورا وقاعد بالنص يطالع و انا اقول لخويي اصدمه يارجال الموتر موترك فدا راسك و قال عني قسم بالله لاصكك كف اخلي راسك يطلع من القزازه اللي على يمينك

صاحي انت ؟ خبل ؟ لا تصدمه وقسم بالله لا صدمته لا العن شكلك وشكله ههههه

و قال عمي امشو وراه ولا تشكووه اننا نطارده , يعني لا تدعس ولا شيء , كانك واحد عادي

وفعلا سوينا طريقته , وسار ما بيننا وبينه الا 10 متر تقريبا

والولد ذا خبل يحسب ان السياره له وماشي واثق فيها !!

الا ونشوفه يفتح الشباك ويطلع يده ويرمي زقارته

ويشغل زقاره ثانيه وماسك الزقاره بيد و الولاعه بيد و السياره حاذفه يمين وهو لاف وجهه يسار عند القزازه ويحاول يشب زقارته

واقول السياره السياره السياره درببببببببببببب الجيب شمع بالرصيف والجنط انكسر

وينزل من على الرصيف ويمشي ولا كانه سار شيء

والسياره نشوفها تطلع لون ابيض من تحت وقلت السياره انحرفت السياره انحرقت ومدري الا وكرتون المنديل مشمع في راسي من ورا من عمي ههههههههههههههههههههههههههههههههه

ونمشي وراه , والله انه ماشي 120 ويدخل مع اللفات ولا همه ولا يضرب فرامل , اشوف المازدا متعذب وينطنط من الجنط المكسور ولا هامه وتشوف المازدا لا دخل مع اللفه كيف يروح يمين وشمال قدامك بس بصراحه والله انه راسي على طول يتعدل يعني يلف لفه يمين واحيانا لفه يمين وشمال ويتعدل بسرعه , الجمس يحوس ويهج فلازم نهدي الى 80 كذا وندخل مع اللفه عشان نقدر نعدله ولا يهج ويمكن لان الجمس دفع خلفي والمازدا دفع رباعي

الزبده انه عدم ام ام ام الجيب و السياره تمشي على جنط مكسور

المهم وياخذ اللفه الثاني ويصقع الجنط الخلفي في الرصيف لان اخذ اللفه بسرعه وصدم الجنط اللي ورا بالرصيف والسياره راحت للجهه الثانيه

ويدخل مع اللفه الثاني على سرعه جنونينه واحنا وراه

المهم ويطلع على شارع عام , وقال خويي والله لا اجيبه السياره تنطط من الجنط المكسور والمقص انكسر والمساعد انفقع وهذا يمشي عليه 120 لا يسوي فيه حادث

المهم ونوصل عنده وهو من جنبنا بالتمام , وقدامنا دوار , والحمد لله ان الدوار قدامنا

المهم ويوم دخلنا الدوار حديناه شوي شوي , يعني احنا نمشي سيدا , ما نلف مع الدوار , والدور لازم تلف منه عشان لا تزنق اللي على يمينك ويركب الرصيف

لكن احنا نمشي سيدا عشان نحده في نهايه الدوار ونخليه يركب الرصيف من اليمين

المهم ونحده ونحده ويفتح القزاز ويقول وش تبون انتم

قسم بالله انه واثق ان سيارته ويمشي وهو متكي على التكايه ويشب الزقاره وكان السياره له

المهم ان قزازته على قزازتي وانا افتح قزاز سيارتي واقوله الموتر للبيع ؟ قال وش تبون انتم

قلت السياره لك ؟ قال ايه لي وخروا عني لا اصدمكم , وانا مستعد ابنط عليه من القزاز في وجهه

وشوي الا والدرويه واخوي جايين من الشارع الثاني !!

واشوف الولد انخرش

شوي ويلف خويي و يخليه يطلع من الدوار واقوله وش فيك ياثور , قال ادخل من الشباك بسرعه , ودخلت , والولد على يميننا الان ومن جنبه الرصيف

و يضرب خويي فرامل و يلف التاهو عليه يمين وهذاك خرع وركب الرصيف وانا فتحت الباب وهو فتح الباب بسرعه و فكها سبرنت

الحق ولا ما تلحق

وأنزل بسرعه والحقه والحقه , وهو قدامي والف وراي واشوف خويي وعمي وراي يلحقوه معي

واقولهم صبحتكم السياره السياره السياره حقتي شغاله ماي كار شغاله

وعمي وقف ورجع للسيارات

وانا وخويي نلاحقه ودخل عماره واحنا وراه , ويصيح ويقول ياعيال الحقوني درينا ان السالفه فيها إن , وانخرشنا , وما دريت الا وخويي نط عليه ودعكه في الارض , وقام وقعد على صدره , ومافيه الا شغل بقوس يمين وشمال يمين وشمال والولد يقول بموت ما اقدر اتنفس

وطلعوا اثنين من العماره وقالوا اذكروا الله , وانا على طول نطيت وقلت وخروا عنه احنا من الاستخبارات واذا قربتوا منه بتكونوا مشتركين معه في القضيه ,, قلت ذا الكلام عشان حسبتهم بيفزعون له فحاولت اخرعهم بالهكلام عشان يبعدون عنا

والمشكله الولد كسر خاطري قسم بالله , لو تشوفه تقول هذا ما يسرق سيكل , وشكله بريء جدا والولد وسيم يعني صفات المجرمين ما تتنطبق عليه ابدا ابدا وحرام يكون مجرم

المهم انا نزلت من العماره عشان اشوف سيارتي والوقت الان 4 الفجر والمساجد بدأت ترفع الاذان وعمي دق على الشرطه وجت 6 دوريات عند العماره

وخويي كان فوق صدر الولد لين ما جت الشرطه والمشكله خويي دب , وقتها ما ادري كيف كان يركض معي , لو تشوفه تقول اتحداه يسابق سلحفاه لكن بيض الله وجهه ما قصر , فاقولكم قعد فوق صدر الولد لين ما جت الدوريات , ويوم قام من على الولد , الولد شوي ويغمى عليه , سرت تتحكم فيه مثل الميت, سار مثل اللي فيه بنج , وعلى طول دخل به الشقه وغسل وجهه من الدم عشان لا يتقاضا عليها , ونزله للدوريه والناس كلها تطالع وكان وقت صلاه فجر , ويوم الولد شاف الناس

قال ايوه , لاني ولد زنا تسوون فيني كذا , لاني ابغا سياره توديني وتجيني تسوون فيني كذا , لان الحاجه حدتني قمتوا ذليتوني لان ولد حرام هذا اللي استحقه , اقتلوني خلوني ارتاح من نفسي , ليه ما قتلتوني هاه ليه, والله ما ابغا اعيش اقتلوني , وقعد يبكي

وقتها انا تأثرت قسم بالله مع انه سارق سيارة عمي لكن والله لو تشوف وجهه تقول مستحيل يكون هذا سرق السياره والله وجهه بريء ولا هو حق سرقات ومبين انه طيب ماهو مثل بعض الناس اللي تشوف وجهه وتقول هذا مجرم ومحترف بعد , لا لا , هذا والله غير لو تشوفه تقول هذا كانه مبتعث , الولد نهائيا ماهو حق سرقه

وقال عمي والله لو ان الكلام اللي يقوله فعلا صحيح بأتنازل عن القضيه بكبرها الآن

شالته الدوريه , واحنا كلمنا الرجالين اللي طلعوا من الشقه , وقال اللي عمره 45 سنه اي نعم هذا ولد زنا وانا كفلته لكن يوم جت المصايب تبريت منه وهو فعلا ولد زنا الله يستر عليه بس ولايجعلنا من الشامتين

كلمني عمي قال والله اني مسامحه لوجهه الله وما بغا منه شيء واكيد ما سوا هالشيء الا لان الحاجه حدته

قلت خير ماسويت , والله انه كسر خاطري يوم انه يقول لاني ولد حرام تسوون فيني كذا , ويقول اقتلوني , وقال عمي حتى انا تأٌثرت ووالله اني مسامحه لوجهه الله و الله يستر عليه ويحفظه ويصبره

وبعدها رحنا للقسم وقال الظابط وش تبي بالظبط قال انا بتنازل لكن بشرط انه يجيب لي الجوالات اللي سرقها لاني جبتها لعيالي

وقال انه باعها في محل , وقال عمي لازم اخذ الولد ويجي معي دوريه ونروح للمحل ويرجع جوالتي

وفعلا راحوا وقالوا اكيد ان راعي المحل متعاقد مع الولد واي شيء يسرقه الولد , يبيعه لك , و حطوه في ورطه مالها اول ولا تالي وفي الاخير فكوه , وسو هالشيء له عشان مره ثانيه يكون حريص و لا يشتري اي شيء مسروق بدون اثبات , هذا اذا ما كان فعلا ممول للولد

وتنازل عمي عن القضيه و الولد فضح خويه الاسمر و طلع خويه الخال هو راس البلا وهو اللي قاله اسرق واحنا على العموم تنازلنا عنه وشيكنا على السياره ولا طلع عليها مخالفات او بلاغات ولله الحمد

وراح صلح السياره وكلفته 7 الاف ريال قطع من الوكاله ونفض بطن السياره والحمد ما فيه الا الجهه اللي عند الكفر الامامي اللي متأثره وباقي بطن السياره سليم واشترا جنط جديد وكفر جديد والمبلغ طلع اجمالي 7 الاف

وصلحها في ورشه خويه يقال له المالكي , والمالكي معروف , عندهم مراكز فيها عماله محترفه , وقال بأصلح لك سيارتك بلاش بس جيب القطع وازهلها , >>> هذولي الاخوياء اللي يقفون معك بالشده والرخاء , وشفت لان عمي سوا خير , حصل خير , وصدق البيت اللي يقول

بعض البشر يسوون من الناس مليون , تحطهم على يمناك لا احتجت حاجه

وبعض البشر ودك تحطهم بكرتون و تكتب على الكرتون وسطه دجاجه



والعامل زعل علينا لانه ما بياخذ ولا ريال ولا فحص المكينه وقال المكينه سليمه وقلنا له ما فيها تهريب متأكد صديق قال ايه وانا والله اني شاك فيه

ويوم طلعناها خبطت المكينه وطلع كرتير المكينه مكسور ويهرب زيت والعامل مافحصها حسبي الله عليه ويقول سليمه هو وراسه ورجعت ابضربه وحصلت المالكي خوي عمي وقال وش فيه سلامات قلت العامل حسبي الله عليه قال ان المكينه سليمه وطلعت تهرب زيت , ليه ما فحصها , ياخي يبغاني اعطيه فلوس عطيته بس يقول ان المكينه فيها تهريب

المهم , قال المالكي امسوحها بوجهي هالمره وبأودي سيارتك عند ورشه اخوي , والورشه قريبه جدا من ورشته اسمها مركز شداد للمرسيدس حتى هي مركز راقي , وقال ببلاش اصلحها لك وتكفون العذر والسموحه

ورحت قلت لعمي وقال لا احرجنا الرجال انا بجيب القطع على حسابي و هم عليهم قيمة الاصلاخ

وقلت اتفق مع العامل على المبلغ اللي يطلبه وبعد ما يخلص كلم المالكي يقوله الوضع , عشان يشتلغها لك شغل ممتاز , لا تقول ما بعطيك فلوس لان انا صديق بابا , لو قلت له كذا راح يسوي مثل خوينا الاول ويجيب لك مصيبه ثانيه

وفعلا اتفق معه على مبلغ 4 الاف ريال او 3500 لتركيب المكينه ,
والمكينه سعرها بالوكاله 19 الف ريال و النص مكينه ب 9500 واخذنا نص مكينه اللي فيها البساتم وصلحها واعطاه عمي 1500 عشان نجبر خاطر العامل , مع انها ببلاش لكن عشان تعبه لانها اشتغلها شغل وكاله

وبس هذي القصه




واعذورنا على الاطاله حبايبي , محبكم ابو يزيد











إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



سيارات للبيع

الردود


الله يسعدك يارب :)


up 0 down 0
ابو يزيد 000 8711
قبل 4 سنه و 7 شهر



زنا ولا يجعلنا من الشامتين؟! الله يكملكم بعقولكم ههههههههه


up 0 down 0