أضف سؤال أو موضوع جديد          

سـامـح وبـتـلـقـاهـا قـدام - ارجوا من الجميع الدخول

up 45 down 11
ابو يزيد 000 8712
قبل 7 سنه و 9 شهر



بسم الله الرحمن الرحيم

السلام عليكم ورحمة الله وبركاته

كيفكم عساكم طيبين إن شاء الله

قبل شهرين كذا دخلت الالتيما بورشه بالصناعيه القديمه عشان كان المكيف خربان وغيرت كرومبوسر و كنت بأغير الفحمات الاماميه والخلفيه ويايات اماميه وتشيك على المساعدات , المهم قالي بعد 5 ايام تعال استلمها

وكنت اخذ جيب الوالد في هالفتره يوم سيارتي بالورشه

وذاك اليوم كنت ماشي , وواحد كان واقف عند صيدليه ( كامري ) وانا ماشي في خطي الايمن

وراعي الكامري دق ريوس وانا اشوفه وهو يدق الرويس وكنت بأدق له بوري او بأكبس له العالي عشان لا يرجع علي , لكن شفته وقف وقلت اكيد انه منتبه ووقف , عشان لا يرجع علي ويطلع بخطي الايمن ويصدمني بخلفية سيارته

لاني انا بالخط الايمن وجنبي مواقف الصيدليه مباشره وراعي الكامري في المواقف هذي

فراعي الكامري يوم دق رويس كان في الحقيقه ما هو منتبه لي , المهم يوم قربت من عنده هو كسر اللفه يسار لان من جنبه يسار مافيه سياره وطلع على خطي بزاويه الصدام حقه الايسر فهمت علي !!

يعني كان فيه موقف فاضي من جنبه يسار , فدق ريوس خفيف ووقف وانا احسب انه انتبه لي ووقف , وهو بالحقيفه ما انتبه لي , والوقوف هذا مو عشاني , عشان من جنبه موقف فاضي فهو رجع خفيف ووقف , و لف يسار في نفس موقفه ودخل بالموقف الثاني وبدأ وجه سيارته يطلع من الزاويه بالخط الايمن

وانا كنت ماشي بسرعه 40KM كذا واحسب انه يشوفني وما دقيت اي فرامل

وما ادري الا و ذيك اللطمه واصوات التعفيط جوا السياره وصوت تفحيط وكل هذي السالفه يمكن سارت في 20 ثانيه فقط

انا من يوم شفته وقف نسيته وقلت هذا منتبه لي , وكملت طريقي , وما دريت الا وهو شايل علي الابواب اليمين وزيق الرفرف الخلفي مع الفيابر كامله حقت الابواب

وهو بس زاويه الصدام وراس الرفرف الايسر وانا الجنب الايمن :(



ونزل من السياره مثل المجنون اللي مو مصدق وش اللي سار !!

ويقول سلامات سلامات وانا اشوفه جاي علي , حتى ما شاف الصدمه حقته ابد جاي عندي يقول سلامات عسا ما سار لك شيء والرجال عمره بالعشرينات كذا ووجه منخرش مثل اللي ماهو مصدق وجالي وقال اهم شيء سلمت مافيك شيء

وقلت الحمد لله انا سلمت وما فيني شيء الحمد لله , ورحت جمعت الفيابر لانها طايحه بالطريق والناس تمشي اخاف تندعس و حطيتها بشنطة السياره

وقلت له وش فيك الله يهديك , والله شفتك وقفت قلت اكيد منتبه لي , وما دريت الا وانت مطير الجنب علي الله يصلحك !!

وقال لي لا انا كنت ماشي بطريقي وانت لفيت علي وانا والله تراني مسامحك ومابي منك شيء والله يستر عليك !!!

ما ادري اضحك ولا ابكي ولا اسكت !!!! , هو الغلطان ويقول مسامحني المهم انا ما احب ادخل في مجادلات وقلت له دق على نجم عشان يقدر الحادث

و عشان يحدد الغلطان لانك انت تقول انك الصح وانا اقول انا الصح فـ دق على نجم عشان يحكم بيننا الله يحفظك :)

وقالي ترا مامعي تأمين !!! وقلت طيب وش اسوي الله يهديك , السياره ماهي لي , السياره للوالد وما اقدر اسامحك , لو كانت لي والله عادي !!

المهم انحرج وانا رحمته لكن وش اسوي السياره سياره الوالد و 2010 بعد وهو الغلطان

المهم قطع كلامنا واحد دق له بوري قال وخر سيارتك ابي امشي لان الكامري مغطي على المواقف اللي عند الصيدليه وركب سيارته وقدمها قدام ورحت عنده وقلت دق على نجم وخلهم يجون لان جوالي مافيه شاحن

قالي طيب وانا قلت له بروح اشبك جوالي في السياره واطلع الرخصه والاستماره والتأمين وانت بعد جهز اوراقك وقال طيب

المهم زاد قدم السياره قدام شوي وانا بحسن نيه قلت يمكن عشان الناس وقعدت اطلع اوراقي وبعد ما طلعتها لفيت اشوف راعي الكامري الا وراعي الكامري ماهو موجود شرد , انا لله وانا اليه لراجعون

المهم كلمت نجم وما كملت 20 دقيقه الا وجاء شاف الحادث وقال حتى لو انت الغلطان 100% و الخصم شرد انت بتكون الصح 100% وهو الغلطان واهم شيء رقم اللوحه معك قلت ايه , ( قزيت الارقام والحروف بدون ما اخليه يشك ابدا :) ) وعطيتهم اياه وكلمنا المرور وطول يمكن فوق ساعه وبعدين جاء وسجل كل شيء

ومشيت وبكره راجعتهم و طلع فعلا رقم اللوحه صحيح والكامري نفسها لونها ابيض فل كامل موديل 2008 وقالوا خلاص رح قدرها عند شيخ المعارض و بعدها رح للثلاث ورش وقدر التكلفه و عطنا التكلفه الوسط و نخليه يدفعها لك غصبن عنه ونعمم على سيارته انها صدمت سياره وشردت واي مرور يوقفه راح يجيبه القسم مباشره و راح يدخل بالتوقيف لين ما يدفع

و انا تذكرته وقلت في نفسي يارجال الناس عندها ضروف , وانا صحيح اني عندي ضروفي وما معي فلوس للتصليح وسيارتي في الورشه واقل شيء بتكلف 2500 ريال , ولازم اصلح سيارة الوالد !!

لكن مو بس انا اللي عندي ضروف , حتى اللي صدمني يمكن يكون عنده ضروف اصعب من ضروفي !!


وسبحان الله ذكرني بنفسي قبل لا اطلع رخصه كنت اخاف اذا حكيت او صدمت أو أو

وقلت تدري يا رجال احنا طالعين من هالدنيا وما بناخذ شيء معنا من هالفلوس , ما بناخذ الا الاعمال الصالحه والاجر , فأنا بأمسامحه وبتنازل عنه و انا سامحته مع ان ضروفي صعبه ذيك الايام , لكن اللي عند الله خير وابقى , و رحت تسلفت الفلوس وجيت اعطيها الوالد والوالد قال يارجال اهم شيء سلامتك وخل الفلوس معك , لكن خذيت على نفسي وعد اني اصلح له سيارته بإذن الله

و انا سامحت الرجال لعل الله يفرج عني كربه مثل ما فرجت عن هالرجال كربته وابشركم بفضل من الله فرجت لي كرب كثيره , و هذا الموقف , سبب رئيسي

وياليت راعي الكامري يكون معنا , ويقرأ كلامي , وانا ما ابغاه يرد او يشكر او يعتذر ابدا , لاني انا مسامحه لوجه الله وما ابغا الا الاجر على ذلك , بس ابغاه يعرف عشان لو كان ضميره مأنبه نوعا ما , اخليه يرتاح , ويعرف اني مسامحه ومحلله وما ابغا منه شيء , وانا ما قلت هالكلام الا اني متأكد من ان ضميره مأنبه لان شكله كان محترم وعاقل وقت الحادث وودي اني يعرف اني مسامحه عشان اريحه , واعرف انه ما شرد الا ان عنده ضروف اصعب مني , فلازم نقدر ضروف الناس , وان شاء الله اني بالقاها قدام

الخلاصه إن الحياه روايه جميله , فقط اقرائها الى النهايه , ولا توقف عند سطر حزين , فما بعد العسر الا اليسر , و التسامح قد يكون أحيانا صعبا لكن من يصل إليه يسعد , وهذا الكلام من واقع تجربه , وأنا احب يكون قلبي نظيف وماهو شايل على احد بشيء , فدايم اسامح رغم انهم يقولون الطيبه الزائده ما تصلح , ولكن انا اردد هذي الايه ( من عفى واصلح فاجره على الله ) ولست ابالي بكلام الناس , وكلام الناس هو آخر ما أفكر فيه , والتسامح صفه حميده , والتسامح يخليك تعرف إن البشر كلهم خطائون , فتهون عليك اخطائهم , فما فيه مشكله ان وقع منهم خطأ بدون قصد , والتسامح يخلي قلبك مرتاح , ويبعد عنك الحقد و الغضب و يخليك تعرف تنام وقلبك مرتاح , وتحس بسعاده دايمه , لان قلبك نظيف , و لانك سامحت شخص , وهذا يمكن عادي عندك , لكن عنده هو شيء عظيم , وان كان ماهو مقدرك انك سامحته , فعادي مدام قلبك يسامح , فهو ما بيشيل عليه بشيء , و أجرك على الله , وحطها في بالك , اذا زرعت شيء بكره بينبت لك , يعني اذا سامحت اليوم بكره راح تتسامح ويفرج عنك كرب , وما راح يضيع اي جميل في هالحياه اينما وضع

فياليت اننا نمشي على مبدأ : أسامح لإرتاح , وأتناسى لأبتسم , وأصمت لإني لا أريد أن اجادل , وأتغاضى لإن لا شيء يستحق , وأصبر لإن ثقتي بالله ليس لها حدود

ولا تخلي في قلبك اي شيء ضد احد , سامح واصفح وتجاهل واحسن الظن , لان الحياه كلها لحظات , وتستحق ان تعيشها براحه , والراحه ما بتجيك الا لما يكون قلبك نظيف , عود قلبك وبتشوف النتيجه وبتشوف الراحه

واذا سامحت واحد مايستاهل إنك تسامحه , فحط هذا الكلام في راسك : أسامح ليس لإني أحبك !! بل لأنه يقال يوم القيامه يلتقى المتخاصمون , وانا لا أريد رؤيتك مره اخرى !!



وهذي صور للصدمه , وسيتم انزال صور بعد التصليح المتواضع جدا :)

التصليح عباره عن : ملع ب 10 ريال + الشفط بحقت البلاعه وانتوا بكرامه وتركيب الفيابر :))



ملاحظه مهمه : اولا اشكركم جزيل الشكر على الاوقات اللي قضيناها بالهمنتدى ويشهد الله انها من افضل الايام , والله لا يحرمنا من وجيهكم الطيبه , ولكن انا بأقطع عليهم لفتره علمها عند الله , فأتنمى اللي عنده شيء او شايل علي بشيء يقولي هنا او على الخاص ويبشر بالخير :) , وانا بترك المنتدى للأسباب خاصه واولها سار همي الاول والاخير هالمنتدى وسار يسبب لي قلق و نوع من الارق , فقررت اريح راسي لفتره علمها عند الله , واذا هديت الامور بأفكر وأشوف ونقول إن شاء الله اننا نرجع مره اخرى

واتمنى اني أكون ذكرى جميله في حياه كل انسان تشرفت في معرفته , ومن غلطت عليه فأرجوا منه المسامحه , واللي غلط علي , انا مسامحه ومحلله ليوم الدين , واهم شيء تعرفنا على رجال والنعم فيهم , ولو بأعدهم ما بقدر احصيهم , لكن اي واحد يقرأ كلامي يعرف انه له معزه في داخل قلبي , وما اودي اكتب الاسامي لاني بنسى ناس كثير , لكن اللي يعرفني بيعرف ان له قدر كبير في قلبي , وبس هذا اللي كان ودي اقوله , وصراحه في هالاوقات يخونني التعبير ولا اعرف اعبر

فالنهايه الله يحفظكم ويوفقكم ويسعدكم دنيا واخره , واستودعكم الله التي لا تضيع ودائعه , والسلام عليكم ورحمة الله وبركاته

محبكم : اسامه الغامدي ( ابو يزيد )











إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


امتعتنا صراحه .. اسلوبك جميل جدا .. كنك قدامي تتكلم

بيض الله وجهك وعوضكم خير


up 1 down 0
ابواياد44 1
قبل 7 سنه و 9 شهر



موضوع جميل بصراحة...


up 1 down 0
ميزووو 2013 16
قبل 7 سنه و 7 شهر