مازدا CX9 2015

انا ماجربت السيارة بس لقيت عليها عرض في وكالة مازدا ب117 الف فل كامل موديل 2016 لان الشكل الجديد بيتغير في 

موديل 2017 وبينزل للسوق بعد 3 شهور وبالتوفيق

متأكد يا تركي  ان 2017 بعد 3 شهور .

أخوي السياره ساقطه في أختبارات التصادم و الأمان .. أنتظر الشكل الجديد شوف كيف أمانه ..  
و الأفضل تاخذ السنتافيه 

ما انصحك تشتريها 
اول شي السياره فاشله في اختبارالتصادم 
ولمن ركبتها في الوكاله الداخليه جودتها سيئه جدا وكلها بلاستيك استغربت دا الشي من مازدا 

شاكر لكم جميعا ردوركم

خذ العلم من مجرب و مستخدم

ويشهد الله اني ما اقول هالكلام الا وانا صادق فيه

كان معي 2010

اقسم بالله من اجوود السياره اللي مرت علي

كرفته لين قال امين بسم الله عليه ما شكى من ادنى شيء

مشيته لين 150 الف كيلو ورحت اسوي له فحص

لاني ما سويت له صيانه نهائيا ولا كان يطلب شيء او فيه اصوات او وصوصه في بطنه نهائيا كان وقفته وقفة وكاله

وقلت خلني افحصه وتم فحص بطنه بالكامل

وطلع ما يحتاج الا جلد مقصات فقط و فيها نصف عمر

والباقي من مقصات ومساعدات وكل شيء اسفل ممتاز جدا وفيها عمر وهي حقت الوكاله

بعته على قريبي 

والان دخل في بحر 200 الف كيلو 

ويمدحه لي مدح
 
يقول بس غيرت فيه بواجي لحد الآن

وانا طبعا من قبل

اغير الزيت كل 5 الاف كيلو , وزيت القير كل 50 الف كيلو خارج الوكاله ولكن اشتري الزيت من الوكاله 

وغيرت الفحمات مرتين 

واسعار قطعه جدا رخيصه او معقوله

صدمت بالبابين

وتم تسعيرها بالوكاله

سعر الباب 1100 ريال 

والشرقيه ب 950 ريال الباب

لان الوكالات تختلف 

وقطعه الاستهلاكيه رخيصه ومر الوكاله وتاكد بنفسك

والله لو تجيب لي سياره وتقارنها بالمازدا 

لا اقولك ما تتقارن

اول سياره اكرفها كرف ولا طلبت شيء ولحد الان مع قريبي ولا طلبت شيء

ولا تحسب انها مفككه ومعدومه

والله ياعزمها ممتاز و لا زالت متماسكه جدا وراسيه ومكيفها لا اله الا الله ياهووو ثلج يكسر عضامك

وسواقتها شيء ثاني ما شاء الله

انصحك بدون تردد والله انها تستحق كل ريال يندفع فيها

و شكل 2017 سيء مقارنه بالشكل الحالي

وبخصوص اختبار التصادم

كل المواتر قواطي الحين بلاستك في بلاستك

على الاقل المازدا فيها 8 ارباقات عكس السيارات الثانيه

ولعلمك من اخف الحوادث في السعوديه هي المازدا

نادر ما تحصل جيب مازدا مصدوم

لان سواقته كانها الماني 

توزنه بالشعره

وياليت ما احد يفتي من راسه

انا مجرب و يشهد الله ان كل اللي اقوله صحيح و انها سياره تستحق كل ريال يندفع فيها

والله فيه ناس تمد حها وناس تسبها

الافضل تجرب السياره وانت حكم نفسك

ايه متاكد وفيه مقاطع في اليوتيوب لوكالة  مازدا تسوي تجارب للشكل الجديد 2017 ومكينة جديدة سكاي اكتف

ابو يزيد اتفق معك فيما كتبت من خلال تجربتي للسيارة اغلب اللي مايمدحها ماجربها ينقل مايسمعه .