أضف سؤال أو موضوع جديد          

تقرير عن سيارتي مازدا 6 ستاندارد 2016

up 25 down 6
baziem 66
قبل 2 سنه و 11 شهر



السلام عليكم و رحمة الله و بركاته ...
وفقني الله لشراء سيارة مازدا 6 2016 ستاندارد و له الحمد و الشكر و بعد ممشى 1400 كيلو تقريبا و قيادتها من الرياض إلى بريدة و العكس في إجازة الأسبوع الماضي قررت أنزل تقرير بسيط و راح أبدا الكلام عن أكثر الإشكالات و الأمور المقلقة اللي قرأتها قبل شراء السيارة علما أن تاريخ خروج السيارة من المصنع هو أواخر شهر سبتمبر الماضي يعني قبل أقل من شهرين و علما إن سيارتي السابقة هونداي أكسنت 2012 فل كامل ...
مشكلة طقة الكفر: قرأت عنها كثير أثناء البحث عن السيارة و قيل أنها عيب مصنعي في 2016 و البعض قال إنها بسبب ضغط الكفرات العالي و نصحوا بتخفيف ضغط الكفرات بعد استلام السيارة و فعلا أول ما استلمت السيارة كان الضغط فوق 40 و نزلته لحدود ال30 و في خلال ممشى الـ1400 كيلو ما سمعت أي طقة نهائيا لا في مطب و لا في حفرة و لا فرامل. ربما تكون هذه المشكلة في الدفعات الأقدم و الله أعلم ...
مشكلة تنسيم الهوا: المشكلة هذي كثر الكلام عنها حتى في التقارير الأجنبية عن مازدا 6 2014 و قالوا أنها تعدلت في موديلات 15 و 16 لكن من تجربتي ما زال فيه صوت هوا إذا تعديت 110 تقريبا. طبعا ما هو ذاك الصوت المزعج جدا لكنه يضيق الصدر بحكم إن السيارة وكالة و فيها مثل هالمشكلة. طبعا للتوضيح تنسيم الهوا هو صوت احتكاك الهوا بأطراف أبواب السيارة و ليس تنسيم هوا بمعنى دخول هوا لداخل السيارة لا لا أرجو الانتباه لهالنقطة. طبعا في السرعات الخفيفة داخل المدينة لا تكاد تنتبه للصوت لكن إذا مسكت خط يبين معاك. طبعا مشكلة عزل الهوا هو جزء من عزل الأبواب الضعيف و أنا أكاد أجزم إن هذا مقصود من الشركة و ليس عيب مصنعي لأنه لم يعدل حتى الآن و أيضا هناك سبب آخر (من تحليلي) و هو لجعل السائق ينتبه لجميع الحركات اللي تصير حول السيارة (بوري ، صوت سيارة قادمة) و أنا لاحظتها صراحة إذا كنت بتقاطع أتنبه لقدوم سيارة من صوتها. عن نفسي أعتبر هذا عيب و سوف أبحث حتى أجد طريقة لزيادة العزل ...
مثبت السرعة: كان فيه مشكلة مثبت السرعة ما يثبت أكثر من 145 في موديل 2014 و هالمشكلة أنا تأكدت منها بنفسي لكن في موديل 2016 اختلف الوضع و أنا جربت بسيارتي و وصلت 170 و يشتغل المثبت طبيعي.
في السطور التالية سوف أستعرض بعض النقاط و أتكلم عنها من خلال التجربة ...
• العزل الأرضي: جدا ممتاز على سيارة سيدان و حتى بشهادة بعض الأصدقاء اللي ركبوا معي.
• العزم: دواسة البنزين إذا كنت تدعس عليها بشكل عادي تكون السيارة بوضعية توفير الوقود و ما تعطيك عزم قوي عشان ما تصرف بنزين. أما إذا دعست الدواسة لآخر شي تسمع صوت طقة بآخر الدعسة بعدها تعطيك السيارة كل عزمها. بالإضافة إنه فيه زر سبورت يعطي السيارة عزم و تسارع ممتاز مرة. يبدو لي إن الفرق بين زر السبورت و بين طقة الدواسة إن الأول تستخدمه إذا كنت محتاج عزم و تسارع متواصل طول الرحلة و الثاني تستخدمه فقط في حالة الحاجة أو الطوارئ خلال رحلة عادية لا تحتاج فيها إلى عزم و تسارع متواصل. بشكل عام العزم ممتاز.
• صرفية البنزين: صرفيتها ممتازة جدا جدا مشتني تقريبا 680 ما بين خط و داخل المدينة. فل التانكي 33 ريال تقريبا بنزين 95. مكتوب ببطاقة كفاءة الطاقة إنها تقبل 91 لكن المصري حق الوكالة وصاني أعبي 95 و للحين ما بحثت في موقع مازدا عن هالتفاصيل.
• الرساوة: ممتازة مشيت فيها على سرعة 170 راسية جدا و تحس إنك متحكم بالسيارة.


عيوب السيارة:
1. وكيلها (ما يسوى ملا إذنه شعير) سيء جدا جدا و يكفيك تمر معرضهم أو تدخل موقعهم و تعرف إنه سيء. للأمانة ما جربته بقطع الغيار ولا الصيانة و لكن من تجارب الناس معه قررت إني ما أسوي عنده صيانة نهائيا بس أشتري منه القطع و أبدلها بأي مركز صيانة سريعة.
2. ضعف عزل الأبواب.
3. ريموت السيارة إذا صار بجيبك ما تقدر تميز جهاته عشان تقدر تفتح السيارة بدون ما تطلعه. عن نفسي بديت أميز شوي عن طريق تحسس علامة مازدا في أعلى الريموت.
4. عدم وجود حساسات أو كاميرا و هالميزة افتقدتها كثير.
5. عدم وجود بلوتوث لربط الجوال بالنظام الصوتي للسيارة علما أنه يوجد منفذ AUX.

الخلاصة:
السيارة ممتازة و قيادتها ممتعة و قيمتها مقابل المواصفات (خاصة مواصفات الأمان) عادلة جدا و مقارنة بفئتها في السوق تعتبر الأرخص مقارنة بالمواصفات و رغم العيوب لو رجع بي الزمن ما اشتريت غيرها و أنصح أي واحد يفكر فيها إنه يجرب السيارة يجربها يجربها يجربها و مثل ما قالوا التجربة خير برهان.

و أي سؤال أنا حاضر ...







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



سيارات للبيع

الردود


انا اعبي مازدا6 فل 95 ب48 ريال 


up 0 down 0
آبوووفارسس 4
قبل 2 سنه و شهر



ماقلتلنا الله يسلمك المكيف كيف في عز ظهر الصيف


up 0 down 0
al jiffri
قبل سنه و 9 شهر